بودكاست مستدفر

حلقة اليوم مميزة لثلاث أسباب، السبب الأول إنه هذه أول حلقة جميع أفراد فريق مستدفر يسجلوها في دبي حضوراً. السبب الثاني إنه الحلقة تبدأ بأداء غنائي يريح الأعصاب بصوت شجن يدغدغ الأحاسيس، والسبب الأخير إنه صاحب الصوت الشجن والأداء الرائع هو أول ضيف إماراتي يشاركنا الحديث في البرنامج. المبدع راشد النعيمي دردش معانا اليوم، وشاركنا الحديث معاه المتألقة خيرة بندقجي والفنان عبدالله رافعة. وأتكلمنا على مواضيع كثيرة من ضمنها الفيلم الأخير للأفينجرز وليش ثانوس كان بيحاول يسوي اللي كان بيحاول  يسويه، وتطرقنا للهجة الإماراتية ومسلسل (مايند يور لانجويج) وليش ما يعتبر مناسب للعرض اليوم، ووضع الثقافة والفن في العالم العربي مقارنة بالعالم الغربي وناقشنا فكرة تقبل الثقافات الأجنبية في العالم العربي. وأتكلمنا شوية عن الدراسة و ماجستير الفن المسرحي الغنائي اللي راشد بدأ في دراسته في نفس وقت نزول هذه الحلقة وناقشنا فكرة طلب العلم بعد تكوين الخبرة العملية

مين ما يحب يتفرج أفلام أو مسلسلات؟ ما نعتقد إنه في أحد ما يحبها (وإذا كنت أحد المخلوقات البشرية إللي ما تحبها، فلازم تشوف دكتور نفسي!) كل واحد فينا له أفلامه المفضلة وكل واحد مننا له طقوسه الخاصة للفرجة على الأفلام، واليوم مع توفر المسلسلات بجميع حلقاتها دفعة واحدة… تطورت الطقوس وصارت تمتد لساعات وأحياناً أيام. وعشان نتبحر اليوم في هذه المواضيع إستضفنا خبير الأفلام والمسلسلات صديقنا ماهر موصلي إللي شاركنا الحديث وقعدنا ندردش لأكثر من ساعة وما كفانا الوقت وما قدرنا نخلص كلام. إذا كنتم من عشاق هذا النوع من الفن حتعجبكم حلقة اليوم، وإذا تحبوا تكونوا مطلعين على آخر التوصيات والمراجعات للمسلسلات والأفلام، تقدروا تتابعوا قناة ماهر على اليوتوب

في حلقة اليوم الشباب كلهم كانوا في صف وعمار لوحده في صف! من بداية الحديث وعمير مو قادر يفهم ليش عمار ما يحب يقرأ كتب… وبيحاول هو وباقي الشباب إنهم يقنعوه إنه يجرب يبدأ يقرأ حتى لو كتاب عن القراءة. وطبعاً كالعادة المواضيع تبدأ تتشكل وتختلف زي كل حلقة، ضيوفنا اليوم كانوا حسن البارقي ومحمود زيني و عمير طيبة إللي مغطي مكان رامي في الحلقات اللي راحت. ومن ضمن المواضيع اللي نوقشت في هذه الحلقة مسلسل ساينفيلد الكوميدي، كتابة المحتوى والمسلسلات، الإعلانات التلفزيونية وجودتها، وبالذات إعلان رز الوليمة اللي عمار كان شايف إنه حلو ومؤدي للغرض ولكن باقي الشباب كانوا شايفين إن الإعلان ما كان مناسب للمنتج. هل تتفقوا مع حسن ومحمود وعمير؟ أو تحسوا إنه كلام عمار كان مقنع؟ أسمعوا الحلقة وأعطونا رأيكم!

اليوم أجتمعنا عشان نسجل حلقة… وقبل ما نبدأ عرفنا إنه صاحبنا حسن البارقي قرر يجي يشاركنا، فعبال ما يجي قلنا خلينا نجهز المايكرفونات ونبدأ ندردش شوية إلى ما يوصل حسن… المهم حسن أتأخر والمواضيع صارت حلوة فقررنا نكمل تسجيل وبقدرة قادر صار عندنا حلقة رقم ١٠٢ من بودكاست مستدفر. أتكلمنا على مواضيع مختلفة من كرة القدم ونظم التدريب للرحلات البحرية وكمان ناقشنا بعض النظريات الفلسفية في الفن والعلم. كان معانا في حلقة اليوم الفنان محمود زيني والمتألق دائماً المهندس عمير طيبة. بودكاست بلافلسفة رحلات رويال كاريبيان البحرية مقالة لوكاكو: عندي ما أقوله جهاز تدريب لاعبي الكرة الألماني فائدة التدريب: مايكل جوردان  فكرة ١٠،٠٠٠ ساعة تدريب لإتقان المهارة فيديو مباركة رمضان مع إلمو و كعكي و ماما سيما نظرية المعرفة حلقة بودكاست مستدفر: خلينا مانكون واقعيين نظرية نعوم تشومسكي على فهم اللغة فيلم “داخل عقل آينشتاين”

حلقة اليوم يحتاج لها شوية تركيز… الموضوع ملعبك، مليان مصطلحات انجليزية وعلمية… وجدال عمره ما حصل في حلقة مستدفر قبل كدة! أتكلمنا اليوم عن فكرة السفر عبر الزمن، شيء شفناه في أفلام كثير لكن ما هو مدى واقعية هذه الفكرة؟ هل هي من سابع المستحيلات؟ هل في أي تجارب علمية أو معادلات تثبت هذه الفكرة أو تنفيها؟ كان معانا في الحلقة خيرة بندقجي والدكتور عبدالحكيم جمعة وخبيرنا الفيزيائي (إللي مرارته أنفقعت) الرهيب دائماً عمير طيبة. تعريف الوقت نظرية النسبية لآينشتاين تناقضات في السفر عبر الزمن أصغر وحدة قياس

متخيلين؟ ١٠٠ حلقة!!! إحنا مو مصدقين إنه برنامجنا الصغير اللي بدأ كفكرة صغيرة قبل ثلاث سنوات بالضبط أستمر هذه الفترة. وما كنا حنستمر بهذا الحماس للفترة هذه كلها من غير دعمكم يا مستمعينا الرهيبين! دعمكم لنا هو سر حماسنا… ومهما شكرناكم ما حنقدر نوفيكم حقكم. واليوم وبمناسبة الحلقة رقم ١٠٠ حبينا نستعيد ذكريات الحلقة الأولى إللي بدأنا بيها البرنامج، وحاولنا إننا نعيد نفس روح البرنامج زي ما كانت في ٢٠١٥… فاجتمعوا عمار ورامي مع خيرة بندقجي وعمير طيبة (كان المفترض فيصل العسيري يكون معانا بس ما زبطت) وقعدوا يدردشوا على مواضيع كثيرة من ضمنها خطط مستدفر المستقبلية، الوظايف والبيئة “المؤسسية” في مكان العمل إللي عمار ما يحبها، ونظام التسيير وتحكم المنظمين في الفعاليات المحلية إللي رامي ما يحبها، وبعض الأشياء من عالم الأبطال الخارقين إللي خيرة تحبها، وكمان بعض الأشياء العلمية الفيزيائية إللي عمير يحبها. مرة ثانية نكرر شكرنا لكم ونبارك لنا ولكم بالحلقة الـ ١٠٠ وعقبال الحلقة الـ ٢٠٠ بصحة وسلامة.

وهذه آخر حلقة قبل الحلقة رقم ١٠٠ من بودكاست مستدفر… محنا مصدقين كيف الوقت جري وحنخلص ١٠٠ حلقة! وبهذه المناسبة حنسمعكم تكملة لواحدة من حلقاتنا القديمة. حلقة رقم ٨ اللي سجلناها في أغسطس ٢٠١٥… بعد ما خلصنا تسجيل الحلقة كملنا النقاش كمان نص ساعة. التسجيل هذا أول مرة أي أحد يسمعوا من ثلاث سنوات وكان معانا فيه عمير طيبة و فيصل العسيري، واتكلمنا فيه على مواضيع كثيرة من ضمنها العلامات المسجلة وبراءة الإختراعات وهل تعتبر شيء كويس للبشرية أو لأ. وهل تشوفوا ويكيبيديا مصدر موثوق يعتمد عليه؟ وقد أيش ممكن نثق في كتب التاريخ؟ لأنه في الآخر التاريخ يكتبه الفائز والأقوى، والخسران والأضعف مالهم رواية.

مع إن مدننا فيها الكثير من المميزات اللي تفتقر لها كثير من المدن حول العالم… دايماً نطمح للأفضل. ومع إنه الكثير مننا يعيش في هذه المدن وزار عدد من المدن الأخرى حول العالم، في بعض الأشياء اللي شفناها وعشناها في مدن ثانية نتمنى إننا نشوفها في مدننا. لكن أحياناً نحتاج نظرة إنسان متخصص في مجال العمارة وتخطيط المدن عشان يقولنا ليش بعض المدن ينقصها الكثير، وليش بعض المدن الأخرى تبدوا متكاملة. وعشان كدة قعدنا اليوم مع المهندس هشام ملائكة عشان نعرف أكثر عن مدننا وتاريخها المعماري. وشاركنا في الحديث الدكتور ساري صبان والمهندس عمير طيبة. للأسف كنا نتمنى إنه مهندسنا عمار الصبان يكون معانا في هذه الحلقة بالذات بحكم خبرته في المجال، لكن الأخ في إجازة.

كأس العالم ٢٠١٨ كنا ننتظره بفارغ الصبر لأنه بعد سنين عجاف أخيراً وصل منتخبنا الوطني السعودي لتصفيات كأس العالم مرة أخرى. ومو بس كدة، كمان حنلعب المباراة الإفتتاحية مع روسيا وكمان المباراة حتكون ليلة عيد الفطر. وفعلاً لعبنا المباراة الإفتتاحية وقبل ما أهل سدير يشوفوا هلال شوال ويعلنوا العيد… قرروا لاعبينا إنهم يجيبوا العيد بنفسهم أمام الفريق الروسي بخسارة مضحكة مبكية بخمسة أهداف نظيفة. ما صدقنا العالم بدأ ينسى خسارتنا أمام ألمانيا بثمانية أهداف، نقوم نعيد تذكيرهم  بمستوانا “الرهيب” في إفتتاحية كأس العالم. وعشان نفضفض شوية قعدنا اليوم مع “اللبة” مؤسس حساب كورة جول عشان نعرف أكثر عن أيش اللي صار، وحابين نقول لكم إن كورة جول ممكن يساعدوكم في حضور أي مباراة كرة قدم في أي مكان في العالم. وممكن يوفروا لكم تذاكر المباريات وتذاكر السفر وحجوزات الفنادق بأفضل الأسعار. وبإذن الله مع بداية مواسم الرياضية الجديدة، كورة جول حيقدموا عروض خاصة بمستمعي مستدفر، فتابعونا على شبكات التواصل الإجتماعي لمعرفة التفاصيل. @KoraGoalSA

فريق مستدفر يحب يهنئكم بمناسبة عيد الفطر ويقولكم كل عام وأنتم بكل خير… ولأننا آخذين إجازة اليومين هذه حنقدم لكم حلقة مسجلة مسبقاً في ٢٠١٥ وهذه أول مرة أي أحد يسمعها! ضيوفنا في الحلقة كانوا علي الزين وسندس الزين وخيرة بندقجي. الحلقة كانت أغلبها باللغة الإنجليزية (في أول أيام البرنامج الإنجليزي كان غالب على حلقاتنا) وأتكلمنا على بعض “الناس” اللي بنقابلهم في الشارع كل يوم وتصرفاتهم عادة “مشي حالك”. وبرضه أتكلمنا عن إستخدام برامج تخزين الكلمات السرية اللي بتستخدم في الإميلات وحسابات المواقع وشبكات التواصل الإجتماعي. طبعاً رامي عنده فلسفة خاصة في الموضوع وقلنا أيش أفضل الطرق إللي ممكن نحمي بها حساباتنا الشخصية

مو كل أفلام الكرتون أتعملت للأطفال… في أفلام كرتون أنتجت للكبار فقط! وواحد من أفضل هذه “الكراتين” هو المسلسل الأمريكي “ريك آند مورتي” إللي مبني في عالم خيالي مليء بالمتعة والكوميديا والإختراعات. وفي نفس الوقت… في بعض القصص الخيالية اللي صنعت للصغار والكبار على حد السواء… زي “الكوميك بوكس” أو القصص المصورة اللي أتعرفنا من خلالها على شخصيات زي الرجل العنكبوت وسوبرمان وكمان سلاحف النينجا. اليوم جلسنا مع راكان كدسة وعبدالله رافعة اللي أستدفروا معانا على بعض هذه المواضيع، إذا انتم من الناس اللي يحبوا أفلام الكرتون والكوميكس… الحلقة هذه حتعجبكم، وإذا ما كنتم من عشاق هذا العالم أسمعوها على أي حال يمكن تلاقوا شيء يعجبكم.

رؤية ٢٠٣٠… سمعناها كثير وكل التغييرات اللي بتحصل في البلد مبنية على هذه الرؤية، المشكلة إنه كثير مننا ما قرأ أي شيء عن الرؤية وما عندنا أي فكرة عن أبعادها وحدود التغييرات اللي ممكن تحصل. وفهمنا للرؤية حيساعدنا كشعب إننا نكون جزء من التغيير وعنصر فعال في التحويل الإيجابي. وعشان كدة قعدنا اليوم مع الدكتور محمد حكيم والدكتور المهندس هاشم الزين اللي حاولوا يشرحولنا الرؤية بشكل مبسط عشان عمار بالذات يقدر يستوعبه. أسمعوا الحلقة وقولولنا إذا كان الشرح مفيد وواضح ودقيق من وجهة نظركم.

لسكان مدينة جدة… أيش أحسن المطاعم اللي عندكم؟ اليوم قعدنا مع صديقنا أحمد درويش… أحد مؤسسي مجموعة “The Foodies SA” وأتكلمنا معاه عن الأكل في جدة والموضات المختلفة اللي بنشوفها في السوق اليوم. ومن ضمن الحديث سألناه عن أفضل المطاعم من وجهة نظره وقلنا على إختياراته لأفضل المطاعم في جدة اللي تبيع: ستيك، بيتزا، همبرجر، شاورما، أكل هندي، دجاج بروست، مناقيش، فول، طعمية وختمها بالسوشي.

مع دخول السينما السعودية، وضع صناعة الأفلام الآن أختلف في البلد. والساحة صارت مفتوحة لجيل جديد من الفنانين والمبدعين في مجالات الإخراج والتمثيل والتصوير وكل ما يتعلق بصناعة المحتوى الترفيهي بإنه يتطور ويلاقي جمهوره في بلده. وبالتالي اليوم أجتمعنا مع نادية ملائكة وعلي الشريف وخالد يسلم، مجموعة من الممثلين السعوديين اللي دخلوا عالم التمثيل خلال السنوات اللي راحت وأتكلمنا على مستقبل المهنة في البلد وكل واحد فيهم أعطانا شوية من خبراتهم ونصائحهم.

في ٢٠١٥ قعدوا عمار ورامي مع عمير طيبة وقعدوا يتكلموا على بعض المواضيع التقنية: – ليش اليوم كثروا مستخدمي أجهزة آبل أكثر من أول ما بدأوا؟ – ليش في “Viruses” على الإنترنت وأيش بيستفيدوا الناس اللي بيسووها لمن يسووها؟ – أيش يعني “Hacking” وهل هو شيء سلبي؟ أو ممكن يكون شيء إيجابي؟ – هل نظام الدراسة اليوم في المدارس والجامعات مفيد لنا اليوم؟ أو ماله داعي مقارنة باللي نتعلمه في الشغل؟ – ليش أصلاً بنروح ندرس في الجامعة؟ هل هي وجاهة؟ هل فعلاً لحب التخصص؟