بودكاست مستدفر

من المهم ان الواحد يكون عنده الحرية انه يعبر عن رأية… في نفس الوقت من حق كل صانع محتوى انه ينتج محتواه بالطريقة اللي تعجبه واللي يشوف انها مناسبة له. ونحن في مستدفر نؤمن بهذه المبادئ وفي نفس الوقت نؤمن بأهمية رأي مستمعينا اللي ممكن يساعدنا في تطوير محتوانا في حال رأيهم كان متماشي مع توجه البرنامج. وبالتالي من الحين للآخر بنقعد من أحد مستمعينا وندردش عن بعض المواضيع اللي سمعوها في حلقاتنا… وردة فعلهم لها… وأيش ممكن يضيفوا على الموضوع. اليوم قعدنا مع المهندس الكيميائي خالد الأحمدي اللي تكرم عينا بوقته واتكلم معانا عن بعض المواضيع اللي سمعها على مستدفر زي ”هل نقدر نكون بس أصحاب؟“ و ”ليش أولادكم ما يبغوا زواج“ وبعض المواضيع الثانية اللي طلعت لنا في سياق الحديث وكمان عمار حكانا في آخر الحلقة كيف خالد ”فزع له“ لمن كان حيجيب العيد وكيف أنقذ خالد بمجهوده وكرمه الموقف.

من أكثر الحلقات اللي نحب تسجيلها شخصياً هي الحلقات اللي تكون مع زملائنا من مقدمي البودكاست! وعشان كدة اليوم جيبنا لكم حلقة تحفة مع الشباب من بودكاست هاوس زوفي! والحلقة اليوم هي امتداد لحلقة رقم ٩ من الموسم الخامس من بودكاست هاوس زوفي اللي سجلناها معاهم قبل أيام… وبالتالي لو حابين تسمعوا الجزء الأول من الحلقة ممكن تسمعوها على الرابط: https://soundcloud.com/housezofi/s05e09 كان معانا في الحلقة اليوم فوزي محسون ومحمد الشمالي (Silver Mask) وفراس قشقري اللي أتكلمنا معاهم على أفلام كرتون زمان… مجلة باسم وبعض شخصيات وذكريات أيام الطيبين. الحلقة كانت جداً ممتعة في التسجيل وعارفين انها حتعجبكم!

لمن نقضي سنين من حياتنا نسوي شغلة معينة وبعدين ننقطع عنها تماماً… حيجي علينا وقت اللي نحن في لحياتنا الأولانية! وهذا بالضبط اللي صار مع عمار وكان أحد الأسباب لتسجيل هذه الحلقة. السبب الرئيسي هو لأنه كل ما يشوف شغل ضيف حلقتنا اليوم يندم للحظة انه ترك عالم التصميم المعماري ويتمنى لو كان يقدر يفتح مكتبه الخاص. ضيف اليوم هو المصمم المعماري المبدع خالد هاشم واللي استضافنا في مكتبه ودردشنا عن عالم التصميم المعماري بمحاسنه ومشاكله اللي غالباً ما تتمحور حول العملاء… وكمان دخلنا في بعض دروس الحياة المختلفة اللي عدينا فيها عبر السنين. إذا كنتم مصممين معماريين أو طلبة كليات العمارة فهذه الحلقة أكيد حتعجبكم!

مافي أحد ما يحب ياكل… وأكثر التجمعات العائلية والمجتمعية عادة ما تتمحور حول الأكل. وطالما أحياناً ما يكون لنا نفس نسوي أكلنا بنفسنا وبالتالي نروح مطاعم، وهذا أثار لنا شوية تساؤلات… ليش كثير مطاعم ما تعرف تسوي تسويق جيد لمحلاتها؟ وليش زباين المحلات هذه ما عندهم ولاء كفاية لمطاعمهم المفضلة؟ والسؤال الأهم… ليش بنشوف كثير مطاعم محلية في أوروبا وأمريكا وبتدار من الطهاة اللي أسسوها… لكن ما بنشوف عدد كبير منها هنا؟ شاركنا اليوم الحديث صديقنا أبو ”الفوديز“ أحمد درويش وشارك معاه أبو ”المستدفيرية“ المهندس و الفيزيائي عمير طيبة.

كثير تجينا تسائلات من مستمعينا عن ريادة الأعمال… ”كيف أبدأ مشروعي؟“ أو ”نفسي أشتغل ممثل أصوات“ وغيرها من الأحلام والتخصصات… وبصراحة مافي معادلة سحرية اللي تمكن الشخص من إنه يحقق أحلامة. لكن قلنا نجيبلكم مجموعة من رواد الأعمال اللي بدأوا بشق طريقهم في المجالات اللي يحبوها وبدأوا مشاريعهم من الصفر… وأول شيء مشترك بينهم كلهم كان إنهم ما خلوا جهلهم بطريقة البدء بمشاريعهم توقفهم! كلهم أشتغلوا على نفسهم وعلموا نفسهم كيف يبدأوا… وأهم نقطة هي انهم بدأوا! وشارك معانا اليوم عمر ملائكة الشريك المؤسس في شركة كوانتم، وعبدالرحمن باعقيل الشريك المؤسس في شركة جدة أتراكشنز ومجدي اللولو مؤسس شركة قرنتافاي… وكلهم حكونا عن مشاريعهم وبعض الدروس اللي أتعلموها في عالم ريادة الأعمال. @Quantums.sa @Grintafy @jeddahAttractions

الأطفال زينة الحياة الدنيا… ولكن أحياناً لمن يسكتوا وما تسمعلهم صوت، ثق تماماً انهم غالباً بيسووا واحدة من أكبر المصايب في الدنيا! وكل أب وأم ممكن يأكدوا هذه المعلومة من واقع خبرتهم. اليوم شارك معانا في الحلقة أصدقاء البرنامج عبدالله رافعة وفاطمة المهيري وسعيد الشامسي وعمرو ضياء… وكل واحد حكانا عن بعض أسوأ المصايب اللي سواها وهو صغير، وكالعادة الحوار تخلله بعض المواضيع الأخرى اللي كان من ضمنها مجموعة من النكت البايخة جداً اللي جات في أول التسجيل، بس لأننا ماحبينا نطفشكم من أول الحلقة بها… شلنا أغلبها وحطيناها بعد نهاية الحلقة كهدية اختيارية للي يبغى يسمعها.

اليوم الرجال والنساء صاروا يشتغلوا مع بعض ويتعاملوا سوا كل يوم في الأماكن العامة… وشبكات التواصل الإجتماعي خلت التواصل بين الجنسين أسهل من زمان. لكن الكثير مننا في المجتمع كبر واتربى على الانفصال بين الجنسين وبالتالي مو متعود على التعامل مع الجنس الآخر. لكن في عالم اليوم… هل تشوفوا ان الرجل والمرأة ممكن يكونوا زملاء عمل أو أصدقاء بدون ما تكون في أي دوافع أو أفكار جنسية في الموضوع؟ يعني هل ممكن للرجل والمرأة إنهم يكونوا أصحاب وبس؟ صديقة البرنامج فاطمة المهيري حبت تناقش الموضوع فقعدت معانا واعطتنا رأيها.

التربية مو شيء سهل وأساليب التربية كثيرة… وصعب نجزم انه في طريقة صح أو طريقة خطأ لأنه كل بيئة مختلفة عن الثانية وكل طفل مختلف عن اخوته. بس هذا ما يمنع اننا نحاول نفهم الموضوع أكثر عشان يساعدنا في حياتنا العملية. لأنه التربية مو بس مهمة مع الأبناء… هي مهمة للأخوان في البيت وحتى للموضفين في مكان العمل! اليوم قعدنا مع صديق البرنامج الفنان عمرو ضياء وناقشنا بعض المواضيع المتعلقة بالتربية وبعض القصص الطريفة الي عدينا فيها في صغرنا وبعض الأمور الفلسفية الأخرى المختلفة.

كل يوم والثاني صرنا نسمع عن بودكاست جديد… وهذا شيء ممتاز! لأنه سوق الإعلام الرقمي المسموع صار اليوم أكبر! مما يعني ان مستمعي البودكاست صاروا في ازدياد. وعشان نعتعلم أكثر عن هذا العالم الجميل قررنا اننا نستضيف معانا في الحوار واحد من رواد البودكاست في المنطقة العربية ومؤسس شبكة ثمانية، صديقنا عبدالرحمن أبومالح! واتكلمنا عن الإعلام الجديد وبالأخص البودكاست والتحديات التي تواجه هذا الفن… ثم انتقل بنا الحديث عن تخوفاتنا من الإتجاه اللي تتجه اليه التكنولوجيا وعن المستقبل المظلم اللي ممكن تقع فيه البشرية اذا ما كنا حذرين.

لكل فعل ردة فعل… ولما جزء من المجتمع يسيء في التعامل لجزء آخر ثق تماماً إنه عاجلاً أم آجلاً… الجزء الآخر حيكون عندهم ردة فعل! ولاحظنا في الفترة الأخيرة كثير من النساء في مجتمعنا بيعبروا عن كرههم للرجال… لأسباب كثيرة. فاليوم قعدنا مع المبدعات الصديقات الفنانات أميرة شيخ وفاطمة المهيري وناقشنا هذا الموضوع والكثير من المواضيع الأخرى المختلفة مثل التربية والفن والآنيميشن وكمان فاطمة وأميرة سووا مقابلة صغيرة مع دانة وسارية أولاد عمار وحاولوا يعرفوا منهم رأيهم الصريح في أبوهم. وممكن تلاقوا الأغنية الشهيرة إللي فتحت الموضوع على هذا على الرابط

قد سمعت زوج و زوجة يشتكون من بعض و كل واحد منهم يقول أنه يحب الآخر بس الثاني ما يقدر؟ غالباً لأن محد منهم فاهم لغة الحب للآخر! اليوم في مستدفر نتكلم عن كتاب لغات الحب الخمس لجاري تشابمان و هو خبير و مستشار في العلاقات الزوجية و عبر عمله في المجال لسنوات إستنتج أن البشر يستقبلون و يعطون الحب عبر خمسة ممارسات و إذا قدرنا نفهمها بنعرف كيف نوصل مشاعر الحب بالطريقة الصحيحة مش فقط لشركاء الحياة و لكن للأبناء و الإخوان و الأصدقاء و الناس عموماً و في حلقة اليوم نناقش الكتاب و الممارسات الخمس و هل فعلاً نشعر فيها؟ وبعدين نسوي الإختبار اللي يعلمنا شو لغة الحب الأنسب لكل واحد فينا. ضيوف الحلقة هم فاطمة المهيري، نفلة الزعابي، عبدالله رافعة، عمرو ضياء و سعيد الشامسي رابط إختبار لغات الحب الخمس

وكيبيديا يعرف المنطق بأنه الدراسة المنهجية لشكل الاستدلال الصحيح، وقوانين الحقيقة الأكثر شيوعاً، الاستنتاج الصحيح هو الذي توجد فيه علاقة محددة للدعم المنطقي بين افتراضات الاستدلال وخاتمته. لا يوجد اتفاق عالمي على النطاق الدقيق للموضوع وموضوعه لكنه بشكل تقليدي يشتمل على تصنيف الحجج والكشف المنهجي لـ “الشكل المنطقي” المشترك بين جميع الحجج الصحيحة، دراسة الإثبات والاستدلال بما في ذلك المفارقات والمغالطات، ودراسة بناء الجملة والدلالات. واليوم قعدنا مع الدكتور المهندس محمد عبدالله سرور الصبان وأتكلمنا شوية عن المنطق والفلسفة بصفة عامة وكالعادة تطرقنا لمواضيع كثيرة زي التدريس والتعليم والهندسة والإعلام وغيرها من المواضيع المختلفة.

مسلسل جن اللي قوّم السوشال ميديا وماقعدها كان موضوع حلقتنا لليوم، وكان طلب خاص من صديقتنا الكاتبة والمخرجة فاطمه المهيري، اختلفت الاراء بين مؤيد ومعارض ومجرد متابع للمسلسل وفي هذي الحلقة فتحنا النقاش والفلسفه على مصراعيها للكل انه يبدي رايه الايجابي أو السلبي عن هذا العمل اللي يعتبر أول إنتاج عربي أصلي من انتاجات نتفلكس. ضيوف الحلقة كانوا فاطمة المهيري و عبدالله رافعه و مهاد كاشف و نفله الزعابي و سعيد الشامسي.

قبل تقريباً سنتين من اليوم وفي حلقة رقم ٤٢ مي وبدور زوجات رامي وعمار شاركوا معاهم لأول مرة في حلقة من حلقات بودكاست مستدفر، وكانت أول مرة مستمعيننا يعرفوا أكثر عن حياتهم الشخصية. اليوم الزوجات رجعوا مرة ثانية وبمعلومات أكثر خصوصية! وفي هذه الحلقة بالذات أستعانوا بأحد أحدث ألعاب شركة حجرة ورقة مقص ”حكاوي علاقات“ وهي لعبة تنقسم إلى نوعين من الأسئلة: 1- اختبر معرفتك بشريك حياتك: هي عبارة عن خمسين سؤال يُجيب كل شريك بإجابة تُعبر عن الطرف الآخر في العلاقة. 2- شارك نفسك وعبّر: هي عبارة عن ١٠٠ سؤال عميقة يُجيب فيها كل شخص عن نفسه وعن احتياجاته وعن توقعاته في العلاقة. الموضوع كان في شوية فضايح لكن الأزواج في الآخر أتعلموا أشياء جديدة عن بعض… والجميع أستمتع باللعبة وبتسجيل الحلقة وان شاء الله انتم تستمتعوا كمان بسماعها.

مين ما يحب الألعاب؟ كلنا كبرنا على لعب واحنا صغار… من مونوبولي لأونو لحتى بلوت! إللي عمار ما يعرف يلعبها. وضيوفنا اليوم  سيدتا أعمال سعوديات دخلتا عالم الألعاب بقوة وأخترعوا لنا شركة ”حجرة ورقة مقص“ واللي تهتم بإختراع وصناعة ألعاب عائلية جديدة وممتعة. رولا بادكوك ورفاه سحاب أتكلموا معانا عن الألعاب وأحدث انتاجاتهم، وكمان أتكلمنا عن أمور مختلفة كالعادة من التربية لسوق العمل وتطوير الذات وحتى بعض القصص المرحة من زمن الطفولة. الحوار كان جداً شيق وبإذن الله حيعجبكم، وممكن تعرفوا أكثر عن مشاريع رولا ورفاه على موقع حجرة ورقة مقص أو حسابهم على انستجرام: (@rps_studio)